社民連「張栢芝」玩失蹤

社民連「張栢芝」玩失蹤


【明報專訊】各位宅男，Emily要公布一個壞消息畀各位聽。就係有「社民連張栢芝」之稱嘅行政委員會成員林采薇（圖），近日已被社民連列為「失蹤人口」。有社民連朋友告知小妹，人稱「波波」嘅林采薇，憑住一張貌似張栢芝嘅臉孔，迷住一眾宅男，但自從今年初亮相之後，佢已經絕迹社民連大小會議，至今冇再「蒲頭」。


絕迹會議 手機「停止服務」


早排聽社民連嘅高層講起，波波玩失蹤，係因為屋企人唔多鍾意個女成為公眾人物，見到個女上晒報紙，似乎有啲微言。噚日Emily打過電話畀波波，但佢嘅電話號碼已經「停止服務」，似乎真係去意已決。


社民連中人就話，早排社民連補選行委空缺，當時候選人之一嘅嚴敏華仲好大聲咁話，自己成為行委後，唔會「單挑」十多個男人，因為仲有個波波陪住佢，當時社民連一眾男人都呆晒，因為已經唔係咁多人記得社民連有個行委叫「靚女張栢芝」，所以有人話，社民連遲啲可能又要補選，搵人頂番「張栢芝」個位。