毓民要殺民建聯千人？
2008年11月17日

【明報專訊】民建聯表明會跟進社民連主席黃毓民「掟蕉事件」，毓民都話會反擊， 咬實對方4年！佢話：「追究我掟蕉呀……我要學以色列咁，你殺我100，我殺你1000！」毓民上星期三立法會討論雷曼事件上，發言時就扮民建聯劉江華，窒民建聯事件中轉再轉。
「我要學以色列還擊」
不過，毓民話，民建聯班人唔係佢對手，因為辯才好阿曾(曾鈺成)「上了神」(做立法會主席)；第二個牙擦(劉江華)入了行會，「廢了武功」；陳鑑林最多口水；葉國謙聲沙，大聲少少都唔得；又話「譚耀宗點同我揪」，「唔通搵李慧、黃容根、黃定光等人同我揪呀」？
佢又批評，有政黨人好似「教父級」，唔畀第二梯隊上，以為自己好叻，其他人接唔到佢班，佢又話自己好佩服民主黨甘乃威當時爭取出選港島，夠膽為自己奮鬥，最終殺出一條血路。不過，當時被迫退民主黨單仲偕都同場，唔知會唔會令佢感到尷尬呢？