「以為我哋真係交咗個黨畀佢，真係一個好美麗嘅誤會」

隔牆有耳：黃毓民再批阿陶
早排越洋插社民連主席陶君行無能力領導個黨嘅黃毓民，返港無耐，噚日再批評時調校火力，指當日唔係指阿陶「整體上唔適合做主席」，只係單純針對佢 處理「維園阿哥」任亮憲涉強姦案一事表現。毓民又透露黨內一眾「老人家」，即係三個立法會議員，原本計劃畀阿陶做兩屆主席，試練實力後再參選立法會，可惜 阿陶上任後壓唔住場，「現時呢個計劃似乎唔係我哋能力可以控制到，我哋要幫佢都難」。
毓民又話，交棒時大膽將黨領導層年輕化，效果差強人意，除咗因為有人「人性惡劣」，一味內鬥置「同志」於死地外，亦有人「以為我哋真係交咗個黨畀 佢，真係一個好美麗嘅誤會」。毓民強調冇實際行動倒陶，但稍後三個立法會議員會就社民連整合「提供好重要嘅說法」，以助化解黨爭。