維園阿哥炒樓捱轟

上周日《城市論壇》討論房屋政策，請到自由黨核心成員田北辰就復建居屋畀意見，田二少當時提出以「流轉公屋」嘅形式解決夾心階層置業問題，即刻畀「維園阿哥」任亮憲力斥荒謬，皆因任覺得增建公屋同復建居屋先係治本之道。不過，本報尋日收到一個讀者投訴，內容大致係話任亮憲早前接受訪問時直認炒樓，仲喺二月放晒手頭兩個樓盤，累計賺逾百萬元，質疑佢有心推冧樓市入平貨。

任亮憲當日喺訪問中承認賣咗兩層樓，一間二百幾萬元，一間三百幾萬元，前後確實賺咗七位數字添。此言一出，即時引起大批網民嘅反彈，香港討論區直至尋日已有廿幾頁近四百個留言評論呢件事，當中絕大部分都係批評任亮憲。網民frank_8批評話：「作為炒家，炒起個市，今日居然話樓貴，要為民請命。錢賺了，就過橋抽板，不知所謂。到樓市倒了，自己又可以乘機撈一筆。」另有網民憤言要稅局查吓佢有冇報漏稅添。

套現百萬 進軍股市

任亮憲本身係一家信託公司嘅聯席董事，佢尋日接受我哋訪問時就咁解釋：「我自己做呢行，如果不善投資，好難令客人相信你有能力！」佢又為自己辯護話，私人投資同自己喺房屋議題上嘅立場係冇衝突，佢建議增建公屋同復建居屋，係希望冇能力置業嘅港人有屋住，而唔係推冧樓市喎。至於事實係點，惟有等大家去判斷。

不過，任亮憲講明唔會因此而減少投資。唔講唔知，任亮憲原來係揸鑊鏟嘅炒家，佢除咗炒樓之外，仲有炒股票添。佢尋日同我哋直認不諱話，今年二月確實放咗手上兩個位於港島嘅中小型單位套現逾百萬元，全數用來進軍股市。佢仲估計，明年初應該會加息，到時對樓市影響大，反而息口變動對股市影響冇咁深，加上依家處於經濟復甦初期，藍籌股最受惠，佢自己就手持滙控同中移動嘅股票喇。

任亮憲仲以中移動為例話，中移動尋日收市價76蚊左右，比起金融海嘯前嘅高位足足平成半，估計今年仲會穩步上升，所以買藍籌股嘅回報率分分鐘高達兩至三成。任亮憲講完一大輪炒樓、買股嘅心得後，不忘提醒投資者量力而為，千祈唔好借錢買股票！任亮憲除咗個個星期日去《城市論壇》打躉，平日又不時狙擊商台、民建聯，好似終日無所事事，原來佢係個炒家，典型嘅香港人。